4 aprel tarixində Təhsil Tələbə Krediti Fondunda növbəti “Könüllü Proqramı”nın bağlanışı və könüllülərin təltifolunma tədbiri keçirilib.

Fonddan “Azərbaycan müəllimi”nə bildirilib ki, tədbirdə proqramda fəal iştirak edən, Fondun fəaliyyətinin tanıdılması və maarifləndirilmə sahəsində səmərəli fəaliyyət göstərən könüllülərə təşəkkürnamələr təqdim olunub.

Tədbirdə çıxış edən Fondun İdarə Heyətinin sədri Bəhruz Əzimov və sədr müavini Tahir Xələfov könüllülərə təşəkkürnamələr təqdim edərək, onların təşəbbüskarlığını və ictimai fəallığını yüksək qiymətləndiriblər. B.Əzimov gənclərə gələcək fəaliyyətlərində uğurlar arzulayıb və bu layihənin növbəti dövrlərdə də davam etdiriləcəyini vurğulayıb.

Qeyd edilib ki, 2024-cü il 25 oktyabr – 27 dekabr tarixlərini əhatə edən proqramda ümumilikdə 20 tələbə iştirak edib. Könüllülər Fondun maarifləndirmə işində – ödənişli və əyani əsaslarla təhsil alan tələbələrə və onların valideynlərinə təhsil tələbə krediti barədə məlumatların çatdırılmasında fəallıq göstəriblər. Həmin müddət ərzində ümumilikdə 7 mindən çox tələbəyə Fond tərəfindən məlumat xarakterli zənglər edilərək maarifləndirmə işi aparılıb.