Konfransdan öncə Naxçıvan Muxtar Respublikasının 100 illik yubileyinə həsr olunmuş sərgiyə baxış keçirilib.
Tədbiri giriş sözü ilə açan AMEA-nın prezidenti akademik İsa Həbibbəyli dövlət başçısının “Naxçıvan Muxtar Respublikasının 100 illik yubileyinin qeyd edilməsi haqqında” Sərəncamından irəli gələrək ölkəmizdə, eləcə də Muxtar Respublikada geniş tədbirlərin təşkil olunduğunu söyləyib. Akademik İsa Həbibbəyli Azərbaycanın zəngin dövlətçilik tarixinə öz misilsiz töhfələrini vermiş Muxtar Respublikanın həm də elmi nailiyyətləri ilə ölkəmizin tarixində xüsusi yer tutduğunu vurğulayıb. O, AMEA-nın müxbir üzvü Əbülfəz Quliyevin və professor Sayalı Sadıqovanın həmmüəllifliyi ilə işıq üzü görmüş “Naxçıvan dilçilik məktəbi” və professor Asəf Zamanovun “Naxçıvanlı elmlər doktorları” kitablarının elm xadimlərinin Naxçıvanın 100 illiyinə qiymətli töhfələri olduğunu deyib.
Naxçıvan Muxtar Respublikasının 100 ildə böyük quruculuq yolu keçdiyini deyən akademik İsa Həbibbəyli gələcəyə hesablanaraq atılmış bütün addımların bilavasitə Ulu Öndər Heydər Əliyevin adı ilə bağlı olduğunu söyləyib. Dahi liderlə bağlı xatirələrini bölüşən akademik İsa Həbibbəyli Ulu Öndərin bölgənin elm və təhsil həyatına xüsusi diqqət yetirdiyini, Naxçıvan Dövlət Universitetinin yaradılmasının 25 illiyinə həsr edilmiş tədbirdə iştirak edərək zəngin nitqlə çıxış etdiyini bildirib. Qeyd edib ki, dahi liderin siyasi xəttini uğurla davam etdirən Prezident İlham Əliyev də daim Muxtar Respublikanın sosial-siyasi, iqtisadi, elmi, mədəni həyatına xüsusi qayğı ilə yanaşıb, 2002 və 2007-ci illərdə Naxçıvan Dövlət Universitetində keçirilmiş tədbirlərdə iştirak edib. Vurğulayıb ki, Naxçıvan Dövlət Universitetində həmin dövr üçün tarixi hadisə sayıla biləcək elektron kitabxana Prezident İlham Əliyevin və birinci xanım Mehriban Əliyevanın iştirakı ilə açılıb.
Bu gün Naxçıvanın öz inkişafının yeni mərhələsinə qədəm qoyduğunu deyən akademik İsa Həbibbəyli Azərbaycan Prezidentinin səlahiyyətli nümayəndəsi Fuad Nəcəflinin başçılığı ilə Muxtar Respublikada ölkəmizin iqtisadi inkişafına təkan verəcək layihələrin, quruculuq işlərinin həyata keçirildiyini söyləyib.
Naxçıvan Muxtar Respublikasının Bakıdakı daimi nümayəndəliyinin rəhbəri Bəxtiyar Əsgərov AMEA-da Naxçıvan Muxtar Respublikasının 100 illik yubileyinə həsr olunmuş tədbirin keçirilməsini Azərbaycanın elmi, mədəni, ictimai fikir tarixində xüsusi hadisə adlandırıb.
Naxçıvanın bugünkü uğurlarının təməlində Ulu Öndər Heydər Əliyevin ölməz ideyalarının dayandığını deyən Bəxtiyar Əsgərov hazırda Muxtar Respublikanın Azərbaycanın dünyada ləyaqətlə təmsil olunmasına öz töhfələrini verdiyini bildirib: “Dahi şəxsiyyət Heydər Əliyev siyasi hakimiyyətinin hər iki dövründə xalqımızın milli maraqlarını qoruyaraq çətin tarixi şəraitdə Naxçıvanın statusunun qorunması və sabitliyin təmin edilməsinə öz misilsiz dəstəyini verib. Onun rəhbərliyi ilə Naxçıvanda Azərbaycanın müstəqilliyinin əsası qoyulub, Azərbaycanın üçrəngli bayrağı yüksəldilib, dövlətçiliyimizin dirçəldilməsi üçün çox əhəmiyyətli addımlar atılıb. Ulu Öndərin Naxçıvanın sosial-siyasi və mədəni həyatının inkişafı istiqamətində gördüyü işlər bu gün də minnətdarlıq hissi ilə xatırlanır. Çətin tarixi şəraitdə dahi liderin Naxçıvanda gördüyü misilsiz xidmətləri görən xalqımızın təkidi ilə Ulu Öndərin yenidən Azərbaycan rəhbərliyinə qayıdışı ona Azərbaycan xalqının Ümummilli Lideri statusu verilməsinə qədər gətirib çıxarıb”.
Bu gün Prezident İlham Əliyevin Ulu Öndərin missiyasını uğurla yerinə yetirərək, Azərbaycanın və onun dilbər guşəsi Naxçıvanın inkişafını təmin etdiyini deyən natiq dövlət başçısının rəhbərliyi ilə Naxçıvanın iqtisadi, elmi, mədəni və sosial sahədə əldə etdiyi nailiyyətlərin göz qabağında olduğunu söyləyib. Bildirib ki, Prezident İlham Əliyev tərəfindən təsdiq edilmiş “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”, Naxçıvan Sənaye Parkının yaradılması və Naxçıvan Muxtar Respublikasında yeni istilik elektrik stansiyasının tikintisinə dair Sərəncam qədim diyarın daim dövlət başçısının diqqətində olduğunu göstərir.
Qeyd edilib ki, Azərbaycanın Birinci vitse-prezidenti Mehriban Əliyevanın təşəbbüsü ilə Heydər Əliyev Fondu tərəfindən Naxçıvanın tarixi, mədəni irsi, abidələri qorunub saxlanılıb, bərpa olunub, qədim diyarın zəngin irsi dünyada təbliğ edilib.
O, çıxışının sonunda bildirib ki, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı” çərçivəsində nəzərdə tutulan layihələr Naxçıvanla bərabər, regionun, o cümlədən elmimizin, mədəniyyətimizin də inkişafına təkan verəcəkdir. B.Əsgərov konfransın Naxçıvanın zəngin elmi mühitinin, mədəniyyətinin, dövlətçilik ənənələrinin gələcək nəsillərə çatdırılmasında mühüm rol oynayacağını vurğulayıb.
Daha sonra konfransda “Naxçıvan Muxtar Respublikasının siyasi-hüquqi statusu: beynəlxalq təcrübə və Azərbaycan nümunəsi”, “1920-1930-cu illərdə Naxçıvan ərazilərinə qəsdlər arxiv materiallarında”, “Naxçıvanın qorunması və muxtariyyət statusunun əldə edilməsində qardaş Türkiyənin rolu”, “Naxçıvanda ədəbiyyatşünaslıq: mərhələləri və istiqamətləri”, “Naxçıvan dialektinin səs sistemində homogen əlamətlər”, “Gilənçay vadisi abidələrində arxeoloji tədqiqatlar”, “Heydər Əliyev və Naxçıvanda Azərbaycan dövlətçiliyinin möhkəmləndirilməsi” və “Naxçıvan mədəniyyətinin inkişafında teatr memarlığının rolu” mövzularında məruzələr dinlənilib
