Yanvarın 15-də Azərbaycan Dövlət Pedaqoji Universitetində (ADPU) Heydər Əliyev adına Müasir Təhsil Kompleksinin (MTK) məktəb  direktoru dr. Nelson Urreqo və icraçı direktoru Tural Abbasovla görüş keçirilib. Görüşdə ADPU-nu rektor professor Cəfər Cəfərov, tədris işləri üzrə prorektor dosent Eldar Aslanov və Tədris departamentinin direktoru dosent Sənan Əliyev təmsil ediblər.

ADPU-nun rektoru prof. Cəfər Cəfərov qonaqlara Pedaqoji Universitetin tarixi, universitetin müəllim hazırlığında müasir yanaşmaların tətbiqi və beynəlxalq əməkdaşlıqlara verdiyi önəmdən bəhs edib. Rektor universitetin həyata keçirdiyi və dəstək göstərdiyi yerli və beynəlxalq layihələr, akademik proqramların yenilənməsi və tələbələrin praktik biliklərlə təmin olunması istiqamətində aparılan işlər barədə məlumat verib.

Dr. Nelson Urrego və Tural Abbasov MTK-nın təhsil sistemi, məktəbin beynəlxalq standartlara uyğunluğu və əldə etdiyi uğurlar haqqında məlumat verərək, kompleksin müasir tədris metodlarına əsaslanan yanaşmalarını diqqətə çatdırıb, Pedaqoji Universitetlə əməkdaşlıq imkanlarının həm MTK-nın gənc kadr potensialının formalaşması, həm də gələcəyin müəllimlərinin müasir təhsil standartlarına uyğun, yeni yanaşmalara bələd kadrlar kimi formalaşması baxımından əhəmiyyətli ola biləcəyini qeyd ediblər.

Tərəflər arasında təhsil sahəsində əməkdaşlıq perspektivlərinin dəyərləndirildiyi görüşdə birgə layihələrin həyata keçirilməsi, akademik təcrübə mübadiləsinin inkişafı,  universitet tələbələrinin MTK-da pedaqoji təcrübədə iştirakları, II tədris ilinin tələbələri üçün qısamüddətli tanışlıq təcrübəsinin təşkil edilməsi, kopleks tərəfindən potensiallı tələbələr üçün karyera imkanlarının yaradılması, tədris proqramlarının hazırlanması sahəsində əməkdaşlıq, tələbələrin Beynəlxalq Kembric Proqramının mənimsəmələri, beynəlxalq olimpiada və yarışlarda birgə təmsil olunma məsələləri xüsusi müzakirə edilib.

Tərəflər qeyd olunan sahələr üzrə əməkdaşlıqla bağlı ilkin razılığa gəliblər.