Sumqayıt Dövlət Universitetinin nəzdində Sumqayıt Dövlət Texniki Kolleci Publik Hüquqi Şəxsin kitabxanasında 6 dekabr tarixində “Kitab oxumaq niyə vacibdir?” mövzusunda müzakirə-debat keçirildi. Müzakirədə kollecin tələbələri, kitabsevərlər iştirak etdilər.

Tədbiri giriş sözü ilə açan kitabxana müdiri, yazıçı Günel Eyvazlı (Əlizadə) dünya yazarları, Azərbaycan ədəbiyyatı haqqında ümumi məlumat verdi. Düzgün mütaliə bacarığının, musiqi zövqünün, oxu vərdişinin formalaşması, kitabxanaların bugünkü durumu, dünyaya elm və incəsənət xadimləri, yazarlar haqqında söz açdı, eyni zamanda tələbələri müzakirəyə dəvət etdi. Çıxışın ardından kitabxanaçı Güllü Alməmmədova oxucuları mütaliəyə cəlb etmək üçün üç qadın yazıçı və  onların əsərləri haqqında qısa məlumat verdi.

Tədbir boyunca tələbələr mövzu ətrafında fikir yürütdü, tələbə Abdulla Məhərrəmov və digərləri şeir nümunələri söylədilər.

Tədbirdə, həmçinin videoçarxlar izlənildi, şeirlər səsləndirildi.