Bakı Mühəndislik Universitetində (BMU) Müəssisələrlə əlaqələr və karyera departamentinin təşkilatçılığı ilə İnformasiya Kommunikasiya Texnologiyaları Agentliyinin (İKTA) tanıtımı, onun fəaliyyət istiqamətləri, tələbələrə yaratdığı iş imkanları, təşkil etdiyi yay təcrübə proqramı ilə bağlı infosessiya keçirilib.

Universitetin informasiya texnologiyaları (IT) ixtisaslarında təhsil alan tələbələrinin iştirak etdiyi tədbirdə agentliyin əməkdaşı Sarvan Cəbrayılzadə Rəqəmsal İnkişaf və Nəqliyyat Nazirliyinin tabeliyində fəaliyyət göstərən İKTA haqqında ətraflı məlumat verib. Eyni zamanda telekommunikasiya və poçt sahəsində tənzimləyici bir qurum kimi çıxış edən İKTA-nın əsas  vəzifələrini diqqətə çatdırıb.

Sessiya zamanı tələbələrin agentlikdə təcrübə keçmək imkanlarından, o cümlədən  işə qəbul prosesi, onun müsahibə mərhələsində uğurlu iştirakdan bəhs olunub. Bildirilib ki, çağdaş dövrdə informasiya-kommunikasiya texnologiyaları sürətlə inkişaf edir və  bu sahədə kadr bazasının möhkəmlənməsinə ehtiyac artır. Agentliyin əmək bazarına yeniliklərə hazır, texnoloji bacarıqlara qabil,  yüksəkixtisaslı kadrlar təqdim edən ali məktəblərdə keçirdiyi infosessiyalar da məhz texnoloji qurumlar üçün kadr potensialını formalaşdırmaq  məqsədi daşıyır.

Tədbir tələbələri maraqlandıran məsələlər ətrafında sual-cavab sessiyası ilə davam edib.