ADA Universiteti 2024-2025-ci illər üzrə qəbul nəticəsini açıqlayıb.Universitetdən bildirilib ki, bu il əvvəlki illərlə müqayisədə rekord sayda, ümumilikdə 1349 tələbə qəbul edilib. Onlardan 1019-u bakalavr, 330-u isə magistr proqramları üzrə təhsil alır.
Bakalavr proqramlarına Dövlət İmtahan Mərkəzinin (DİM) keçirdiyi imtahanların nəticəsi ilə 345, SAT nəticəsi ilə 503, IB nəticəsi ilə 20, ADA Məktəbindən isə 108 tələbə qəbul edilib.
Həmçinin ADA Universiteti bu il 18 ölkədən 92 xarici tələbəni qəbul edib.
DİM nəticəsi üzrə qəbul edilənlərin ən yüksək göstəricisi 700 bal, SAT nəticəsi ilə qəbul olanların rekord nəticəsi isə 1570 təşkil edib.
ADA Universitetinin builki qəbul göstəriciləri bir sıra məqamlarla yadda qalıb. Belə ki, DİM üzrə bakalavr proqramlarına qəbul edilən 345 tələbədən 212-si yüksək nəticələrə görə müxtəlif təhsil haqqı güzəştləri əldə ediblər. Daha bir diqqətəlayiq məqam ondan ibarətdir ki, ADA Universiteti bu il özünün əvvəlki illərlə müqayisədə rekord sayda – 18 nəfər Prezident təqaüdçüsü qəbul edib. Bu təqaüdçülərdən 12-si hüquqşünaslıq ixtisasının tələbələridir.
Ümumilikdə, bu il qəbul edilən tələbələrin 32 faizə qədəri ADA-nın müxtəlif təhsil haqqı güzəştlərindən yararlanmaqla təhsil alırlar. Həmin tələbələrdən 3-ü Heydər Əliyev adına təqaüd proqramının, 19-u isə respublika fənn olimpiadalarının qalibidir.
Otuzadək xarici tələbə isə Əlimərdan bəy Topçubaşov adına təqaüd proqramından yararlanır.
Əlavə edək ki, Meksika, İndoneziya, Niderland, Böyük Britaniya və digər ölkələrdən tələbə qəbul edən universitet bu il Braziliyanı təmsil edən ilk tələbəsini salamlayıb.
Regionlarımızda təhsil alan 189 abituriyent, eləcə də I,II və III qrup üzrə ölkə birinciləri ADA Universitetini seçiblər.
Əvvəlki illərlə müqayisədə xüsusilə 5 bakalavr proqramının minimum keçid balında kəskin artım müşahidə edilib. Riyaziyyat proqramının keçid balı isə rekord həddə çataraq 660-a yüksəlib.
Qeyd edək ki, ilbəil təhsil proqramlarının sayını artıran ADA Universiteti bu il şəhərsalma, kommunikasiya dizaynı, heyvandarlıq üzrə də bakalavr proqramları təklif etməyi planlaşdırır.
