Azərbaycan müəllimi qəzeti üçün müsahibə:
Sual: Aytac xanım, ilk növbədə sizi Böyük mütəxəssis vəzifəsinə təyin edilməyiniz münasibətilə təbrik edirik! Bu uğurunuz sizin üçün hansı mənanı ifadə edir?
Aytac Cavadova: Çox sağ olun! Bu vəzifəyə təyin olunmaq mənim üçün böyük məsuliyyət və eyni zamanda yeni imkanlar deməkdir. Mən öz sahəmdə biliklərimi genişləndirmək və təhsil sahəsinə daha çox töhfə vermək üçün bu vəzifəni həm böyük bir şans, həm də motivasiya olaraq görürəm. Həm də Qarabağ Universitetində Böyük mütəxəssis kimi fəaliyyət göstərmək mənim üçün xüsusi bir qürurdur, çünki bu, sadəcə bir peşə deyil, tarixi bir missiyanın bir parçası olmaq deməkdir.
Sual: Aytac xanım, təhsil həyatınız çox geniş və əhatəlidir. Təhsilə başladığınız illərdən bugünkü uğurlarınıza qədər olan yol haqqında bizə daha ətraflı danışardınızmı?
Aytac Cavadova: Çox sağ olun. Mənim təhsil yolum Xaldan kənd kompleks tam orta məktəbindən başlayıb. 2001-ci ildə bu məktəbdə 1-ci sinfə başladım və 2012-ci ildə məktəbi bitirərək, Mingəçevir Dövlət Universitetinə (MDU) qəbul olundum. Ekologiya mühəndisliyi ixtisasını seçdim və 2016-cı ildə fərqlənmə diplomu ilə məzun oldum. Bu müddət ərzində yalnız universitetdə təhsil almaqla kifayətlənmədim, 2016-2018-ci illərdə Lənkəran Dövlət Universitetində Ekoloji biologiya üzrə magistr təhsili də aldım. Hazırda isə doktorantura üzrə təhsilimi davam etdirirəm. MDU-da akademik məsləhətçi və müəllim kimi çalışaraq gənclərə öyrətmək mənim həyatımın ən vacib hissəsinə çevrildi.
Sual: Təlimçi kimi regionlarda və məktəblərdə fəaliyyət göstərməyiniz maraq doğurur. Bu təcrübənizin sizə necə təsir göstərdiyini düşünürsünüz?
Aytac Cavadova: Məncə, bu fəaliyyət mənim tədris yolumdakı ən mühüm mərhələlərdən biri oldu. Elm və Təhsil Nazirliyinin dəstəyi ilə müxtəlif qrant layihələrində iştirak etdim, amma bununla yanaşı, regionlarda və məktəblərdə də təlimlər keçdim. Bu, həm şəxsi inkişafım üçün, həm də şagirdlərə və gənc nəslə daha yaxın olmaq baxımından çox önəmli idi. Xüsusilə ekoloji biliklərin artırılması sahəsində verdiyim təlimlər mənim üçün böyük önəm daşıyır. Gənc nəslin gələcəyinə töhfə vermək və onların ekoloji maarifləndirilməsi baxımından bu təlimlərin əhəmiyyəti çox böyükdür.
Sual: Beynəlxalq layihələrdə iştirakınız sizə hansı yeni perspektivlər açdı? Əldə etdiyiniz təcrübələr haqqında nə deyə bilərsiniz?
Aytac Cavadova: Beynəlxalq layihələr mənim üçün əvəzolunmaz bir təcrübə oldu. Fəaliyyətim dövründə ERASMUS+ layihəsi çərçivəsində GEOCLIC- Sahil Ekosistemlərinin İqlim Dəyişikliyinə Uyğunlaşması üçün Geoməkan Mühəndisliyində Yeni Kurslar – layihəsində iştirak edərək, Ruminiyanın Constanta Marytime University-də və REFRESH-“Azərbaycan Universitetlərində Yaşıl və Dayanıqlı İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması”-layihəsində iştirak edərək, İspaniyanın Barselona Universitetində təlimlərdə iştirak etmişəm. Bərpa olunan enerji və iqlim dəyişikliyinin azaldılması mövzularında əldə etdiyim biliklər fəaliyyətimə yeni yanaşmalar gətirdi. Bu layihələr mənə həm nəzəri, həm də praktiki olaraq yeni üfüqlər açdı və təhsildə beynəlxalq əməkdaşlığın nə qədər vacib olduğunu dərk etdim.
Sual: MDU ilə yollarınızı ayırmaq sizin üçün yeni bir başlanğıc oldu. Qarabağ Universitetində işləmək qərarınızı necə izah edərdiniz?
Aytac Cavadova: 20 may 2024-cü il tarixində cənab Prezidentin fərmanı ilə hörmətli Şahin Bayramovun Qarabağ Universitetinə rektor təyin olunması universitetin gələcəyi ilə bağlı ümidlərimi daha da artırdı. Şahin Bayramov, təhsil sahəsində uzun illərdir davam edən zəngin təcrübəyə malikdir və onun rəhbərliyi altında Qarabağ Universitetinin yalnız yerli səviyyədə deyil, beynəlxalq arenada da böyük uğurlar qazanacağına inanıram. Onun rəhbərlik etdiyi bir universitetdə çalışmaq böyük məsuliyyətdir.
Bəli, 2024-cü ilin sentyabr ayında MDU ilə fəaliyyətim sona çatdı. Amma bu qərar mənim üçün yeni bir mərhələnin başlanğıcı oldu. Cənab Prezidentin Qarabağ Universitetinin yaradılması ilə bağlı sərəncamı vətənpərvər bir vətəndaş olaraq məni çox təsirləndirdi. Bu universitetin yaradılması azad edilmiş torpaqlarımızda yeni bir səhifənin açılması demək idi. Qarabağ Universitetində işləmək mənim üçün böyük qürur mənbəyidir və burada fəaliyyət göstərmək həm tarixi, həm də milli dəyər daşıyan bir missiya kimi qəbul edilir.
Sual: Qarabağ Universitetindəki fəaliyyətiniz haqqında daha ətraflı məlumat verə bilərsinizmi? Bu universitetdə çalışmaq sizə hansı hisslər bəxş edir?
Aytac Cavadova: Qarabağ Universitetində işləmək mənim üçün təkcə bir iş deyil, eyni zamanda bir missiyadır. Universitetimiz tarixi və mədəni zənginliklərlə dolu bir bölgədə yerləşir. Burada olmaq mənə yalnız gənclərə bilik öyrətmək imkanı deyil, həm də bölgənin tarixi və mədəni irsini qorumaq və gənclərə bu irsi aşılayaraq onların şəxsiyyətlərinə təsir etmək imkanı verir. Xocalı rayonuna ilk səfərim zamanı hiss etdiyim qürur və sevinc hissləri izah edilməzdir. Bu torpaqlar şəhidlərimizin qanı bahasına geri alınıb və burada işləmək, azad edilmiş ərazilərdə təhsil prosesində iştirak etmək mənim üçün ömürlük bir qürurdur.
Sual: Qarabağ Universitetinə gələn tələbələrin təəssüratları və sizin onlarla olan təcrübələriniz necədir?
Aytac Cavadova: Qarabağ Universitetinə gələn tələbələrin gözlərindəki qürur və həyəcanı hiss etmək çox təsirlidir. Buranın azad edilmiş torpaqlar üzərində qurulmuş ilk universitet olması onları dərindən təsirləndirir. Tələbələr burada yalnız təhsil almır, eyni zamanda tarixi bir missiyanın daşıyıcıları olduqlarının fərqindədirlər. Mən onlarla biliklərimi və təcrübəmi paylaşaraq, onların akademik inkişaflarına, şəxsiyyətlərinin formalaşmasına töhfə verməyə çalışıram. Bu tələbələrin bir çoxu, burada gördükləri şəraitdən və çox razıdırlar və bizə qarşı yüksək motivasiya ilə yanaşırlar. Gələcəyin alimləri və peşəkarları olan bu gənclərlə işləmək mənim üçün böyük məsuliyyət və qürur mənbəyidir.
Sual: Qarabağ Universitetində çalışmaq sizin üçün nə ifadə edir? Burada çalışmaq hansı dəyərləri əhatə edir?
Aytac Cavadova: Qarabağ Universitetində çalışmaq mənim üçün sadəcə bir iş deyil, böyük bir dəyəri özündə əks etdirir. Bu, tarix və mədəniyyətlə zəngin bir bölgədə yerləşən universitetdir və burada olmaq, gənclərin həyatlarına təsir etmək, onların gələcək inkişaflarına yol açmaq mənim üçün çox önəmlidir. Burada hər bir mütəxəssis öz sahəsində biliklərini bölüşərək, bölgənin inkişafına, elmi araşdırmalar və tədris metodları vasitəsilə cəmiyyətin bərpasına töhfə verə bilər. Qarabağ Universiteti elmi, mədəni və sosial həyatın inkişafında müstəsna rol oynayır və mən burada olduğum üçün həqiqətən çox qürur duyuram.
Sual: Sizə Böyük mütəxəssis kimi fəaliyyətinizdə yeni uğurlar arzulayırıq və vaxt ayırıb suallarımıza cavab verdiyiniz üçün təşəkkür edirik!
Aytac Cavadova: Çox sağ olun! Mən də Azərbaycan müəllimi qəzetinə minnətdarlığımı bildirirəm. Ümid edirəm ki, bu müsahibə təhsil sahəsində çalışanlara və gələcəyin təhsilinə töhfə verəcək gənclərə motivasiya olacaq.
