Bakı Slavyan Universiteti və Azərbaycan Respublikasının Təhsil İnstitutu ilə əməkdaşlıq əsasında və “Regional İnkişaf” İctimai Birliyinin layihəsi çərçivəsində “Təhsildə inklüzivlik: müəllim hazırlığında müasir təhsil proqramları və yanaşmalar” mövzusunda təlim təşkil edilib.

Universitetdən  bildirilib ki, Bakı Slavyan Universitetində müəllimlərin inklüziv təhsil sahəsində nəzəri-praktik biliklərinin artırılması məqsədilə keçirilən təlimlərdə 20 nəfərdən çox olmaqla, BSU-nun professor-müəllim heyəti, həmçinin universitetin nəzdində fəaliyyət göstərən Məktəb Lisey Kompleksinin ibtidai sinif müəllimləri iştirak ediblər.

Təlimlər “Regional İnkişaf” İctimai Birliyi tərəfindən daha əvvəl icra olunmuş inklüziv təhsil layihələrində müvafiq “ToT” təlim proqramlarını uğurla başa vurmuş təlimçi mentor Lamiyə Hacımuradova tərəfindən aparılıb.

İnklüziv təhsildə uyğunlaşma strategiyaları, diferensial qiymətləndirmə, inklüziv sinif mühitinin yaradılması, inklüziv təhsildə gələcəyə baxış və digər mövzular üzrə keçirilən təlimlər müəllimlərə fərqli əlillik dərəcələrində olan şagirdlərin ehtiyac və maraqlarına, sosial-psixoloji və sağlamlıq vəziyyətlərinə uyğun təhsil ehtiyaclarını qarşılamaq üçün praktik səriştələr və metodik bacarıqlara yiyələnmək imkanını təmin edib.

Təlimi uğurla başa vuran müəllimlər “Regional İnkişaf” İctimai Birliyi və Bakı Slavyan Universitetinin birgə sertifikatları ilə təltif edilib. Sertifikatların təqdim olunmasında BSU-nun rektoru Anar Nağıyev iştirak edib.

Qeyd edək ki, təlimlər “Regional İnkişaf” İctimai Birliyinin “Müəllimlərin inklüziv təhsil sahəsində potensialının artırılması” layihəsi çərçivəsində hazırlanıb və Təhsil İnstitutu tərəfindən məzmun baxımından təsdiq edilmiş yeni ixtisasartırma proqramı və Bakı Slavyan Universitetinin “İnklüziv təhsildən inklüziv cəmiyyətə” layihəsi əsasında həyata keçirilib.